Латын әліпбиі

Aıparaq: Naýryz

Kóńildiń kókjıegin keńeıtip, tóńirekke kórik syılaıtyn kókjelek kóktem de kelip jetti. Naýryz – jyl basy, jer dúnıege jan, tabıǵat-anaǵa sán kiretin, Samarqannyń kók tasy jibip, jýannyń jińishkerip, jińishkeniń úziler shaǵy bul.

Aı ataýynyń parsynyń «naý» – jańa, «rýz» – kún degen sózderinen qurаlǵany belgili. Kóne juldyzdyq esepte ony «út» dep ataǵan. Kónekóz qarıalar «Út kirdi, úsik shyqty» dep, naýryzda aýa raıynyń jylynatynyna qýanǵan.

Halqymyz: «Naýryzdyń on bes kúni qudaıdiki, on bes kúni kedeıdiki» deıdi. Bul naýryzdyń alǵashqy jartysynda aýa raıynyń myń qubylyp, qalǵan jartysynda kún jylynyp, qystan qysylyp shyqqan kedeıge keńshilik bolatynyn bildirse kerek. Naýryzda ótip bolmaıtyn uzaq kunder – «uzyn sary» kelip, qońtorǵaılaý qaraózek shaq ta týady. Bul aıda kóktemniń qar eriter «altyn kúrek» ókpek jeli, qarasýyǵy soǵady, kún men tún teńesedi. Aıdyń sońyna qaraı jyl qustary qaıta bastaıdy, sol kezde qar aralas jańbyr jaýady, sýyq jel bolady. Sondaı-aq, naýryz aıy qar erip, jerdiń laısań bolatyn kezi. Bul ýaqytta búkil tabıǵatqa, tirshilik ıesine, ósimdik, jan-janýarǵa kúsh-qýat, qasıet nury quıylady. Sol sebepti, halqymyz «Áz bolmaı, máz bolmaıdy» degen.

Naýryz aıynda qoǵam jáne memleket qaıratkeri Ómirbek Joldasbekov (1 naýryz), ardager jýrnalıst, Qazaqstannyń eńbek sińirgen mádenıet qyzmetkeri Battal Jańabaıuly (7 naýryz), Olımpıada chempıony, Vel Barker kybogynyń ıegeri Baqtıar Artaev (14 naýryz), Qazaqstannyń eńbek sińirgen qaıratkeri, «Dаryn» memlekettik jastar syılyǵynyń ıegeri Aıgúl Imanbaeva (15 naýryz) syndy belgili tulǵalar dúnıege kelgen. Sondaı-aq, bul aıda Dúnıejúzilik azamattyq qorǵanys kúni (1 naýryz), Halyqaralyq áıelder kúni (8 naýryz), Naýryz meıramy (22 naýryz), meteorologıa (23 naýryz), Halyqaralyq teatr (27 naýryz), jerdi qorǵaý kúni (30 naýryz) merekeleri atap ótiledi.

Tamyryn tereńnen tartqan áz Naýryz – bereke men birliktiń, tazalyq pen tatýlyqtyń tuǵyryn nyǵaıtyp, rıasyz shattyq pen qýanyshqa keneltsin. Ulys oń bolsyn, aq mol bolsyn, aǵaıyn!

 

ПІКІР