Аймақтың әлеуеті мол

0 4

тек табанды еңбек табысқа жеткізетінін ұмытпайық

Өңір басшысы Бердібек Сапарбаевтың төрағалығымен өткен аппараттық жиында облыстың ағымдағы жылдың бірінші тоқсанындағы әлеуметтік-экономикалық даму қорытындылары қаралды.

Облыс әкімі Бердібек Сапарбаев өз қызметіне кіріскеннен кейін бірден ағымдағы жылдың бірінші тоқсанында экономикалық көрсеткіштердің өткен жылдың сәйкес кезеңімен салыстырғанда төмен емес деңгейде қалыптастыру міндетін алға қойғаны белгілі. Алайда, нақты факторларды ескере отырып, бұл орайда кейбір өндірістік көрсеткіштер бойынша төмендеу нәтижелері күтілуде. Оған экономика дамуының тежелуіне әкеп соққан коронавирустың таралуының алдын алу бойынша қабылдаған шаралар себеп болды деуге болады. Дегенмен, басқа да факторлар жоқ емес. Олардың негізгілеріне – өнеркәсіп саласындағы «Қазфосфат» ЖШС сары фосфор шығаратын пешінің және Тараз бен Меркі ауданындағы қант зауыттары жұмыстарының тоқтағанын жатқызуға болады.
Облыс әкімдігінің экономика және бюджеттік жоспарлау басқармасының басшысы Гүлдана Жауынбекованың айтуынша, ағымдағы жылдың бірінші тоқсанында жалпы өңірлік өнім көлемі бойынша нақты қорытынды мәліметтер жоқ. Дегенмен, негізгі болжамдық көрсеткіштер орындалады деп күтілуде. Алайда, өнеркәсіп саласындағы өсім өткен жылдағы көрсеткіш деңгейінің тек 85 пайызын құрамақ.
Облыстық мемлекеттік кірістер департаментінің басшысы Ерлібек Зикеев бюджет 1,6 миллиард теңгеге жуық қаржыға толықпай қалу қаупі бар екендігін жеткізді. Департамент қызметкерлері жедел штаб режимінде жұмыс істеуде десек, олардың күш-жігері негізінен ірі кәсіптердің қызметін камералдық бақылауға бағытталған.
Өңір басшысы бюджеттің кіріс бөлігін толықтырудың қосымша көздерін іздестіруді, соның ішінде 2,7 миллиард теңгеден астам қаржыны құрайтын берешекке назар аударуды тапсырды. Сондай-ақ ШОБ субъектілерін әкімшілендіруді күшейту, зейнетақы жарналары мен МӘМС жарналарының толық түсуін қамтамасыз ету, коммуналдық мүлік нысандарын түгендеуді аяқтау қажеттігі айтылды.
Облыс әкімдігі қаржы басқармасының басшысы Роза Исаева бюджет қаражатын игеру 99,3 пайыз деңгейінде қалыптасуы күтіліп отырғандығын мәлімдеді. Ал, кәсіпкерлік және индустриалды-инновациялық дамыту басқармасы басшысының міндетін атқарушы Жандәулет Кенжебековтің айтуынша бірінші тоқсанның қорытындысы бойынша өңір экономикасына 40,3 миллиард теңге инвестиция тартылып, нақты көлем индексі 104,7 пайызды құрайды деп көзделуде.
Тұрғындар экономиканың өсуін немесе құлдырауының басты көрсеткішін азық-түлік бағасы бойынша саралайды. Облыс әкімінің орынбасары Нұржан Календеровтің айтуынша, әлеуметтік маңызы бар 19 азық-түлік түрінің 5-і бойынша баға өскендігі байқалған. Ал, картоп құнының 20 пайызға қымбаттауы тіркелген.
– Баға мониторингі бойынша мобильдік топтарды не үшін құрдық? Көкөніс, қанттың, яғни өзіміз өндіретін өнімдердің бағасы өскен. Ешкім бағаның қымбаттау себептеріне талдау жасамайды. Тиісті басқармалар тек ақпарат жинаумен және фактілерді анықтаумен айналысады. Неге фермерлердің қоймаларындағы азық-түлік қорына талдау жүргізбейсіздер? Олардың өздеріндегі артық өнімдерін нарыққа шығару жолында жұмыс жасау керек. Бұл шараны қазір қолға алудың маңыздылығы зор, – деді өңір басшысы.
Аудан әкімдерінің есептерін тыңдаған Бердібек Сапарбаев оларды салық жинау жұмыстарын жылдың соңғы тоқсанына қалдырмауға шақырып, әр түрлі әлеуметтік төлемдердің мөлшері осы түсімге байланысты екендігін баса айтты.
Өңір басшысы жақын арада дағдарысқа қарсы шаралар үшін қосымша қаражат түсетініне назар аудартып, оның игерілуін он күн сайын бақылап отырудың маңыздылығын ескертті.
– Қандай компаниялар жұмысқа тартылатынын, оларда техника мен мамандардың бар-жоғын нақтылап алу қажет. Негізінен бұл қаражатты жергілікті компанияларды қолдауға бағыттау қажет. Жергілікті шикізат пен құрылыс материалдарын пайдалануға талдау жүргізу, кемінде 22 мың жұмыс орнын құру керек. Сондай-ақ көктемгі егіс жұмыстарын сапалы және уақытылы жүргізу қажет. Пайдаланылмай жатқан жерлерді ауыл шаруашылығы айналымына қайтару, суармалы егістікті ұлғайту және жоғары сапалы тұқымдарды пайдалану мәселелеріне айрықша ден қойған абзал. «Ауыл – ел бесігі» бағдарламасын іске асыруды жандандыра түсу керек. Дағдарысқа қарсы шаралар цифрландыру және заманауи технологияларды пайдалану, электрондық сауданы дамыту процесін одан әрі жылдамдатуға ықпал етуі мүмкін, – деп атап өтті өңір басшысы.
– Нысандар мен қоғамдық пайдалану орындарын дезинфекциялау жұмыстарын күшейту қажет. Қажет болған жағдайда бұл жұмыстарға әскери мамандарды белсенді түрде тарту керек. Медициналық қызметкерлерге біржолғы жәрдемақылар мен Үкімет тарапынан тағайындалған сыйақыларды уақытылы төлеуді әлеуметтік қызметтер барынша қарастыру керек, – деп түйіндеді өз сөзін Бердібек Сапарбаев.

Облыс әкімінің баспасөз қызметі

Leave A Reply

Your email address will not be published.