Жамбыл жаңалықтары

Байзақ ауданы тұрғындарының әлеуметтік маңызды мәселелерін шешуге 13 млрд. теңге жуық қаржы бөлінді

Written by Aray2005

Жамбыл облысында әлеуметтік мәселелерді шешуге және ауыл тұрғындарының тұрмыс-тіршілігін арттыруға ерекше көңіл бөлінуде.

Ағымдағы жылы түрлі мемлекеттік және салалық бағдарламалар аясында Байзақ ауданында 173 жобаны іске асыруға 12,9 миллиард теңге қаратырылды. Бюджет қаражатын 143 шақырымдық автомобиль жолдарын, білім беру, денсаулық сақтау, спорт, мәдениет мекемелерін салуға және жөндеуге, ауыз су, газбен қамтуға, электрмен жабдықтауға, абаттандыруға және басқа да әлеуметтік маңызы бар жобаларға бағыттау жоспарлануда.

Сенбі, 30 мамырда облыс әкімі Бердібек Сапарбаев жұмыс сапарымен Байзақ ауданына барып, жөндеу-құрылыс жұмыстарының барысымен танысты.

Аймақ басшысының аудандағы жұмыс сапары екі мыңнан астам адам тұратын Қостөбе ауылынан басталды. «Ауыл – ел бесігі» бағдарламасы бойынша мұнда 75 оқушыға арналған орта мектепте қосымша кеңейту құрылысы жүргізілуде. Кеңейту жобасында асхана мен спорт залы бар болғанымен, акт залы қамтылмаған. Бердібек Сапарбаев бұл олқылықты түзетіп, жобаға түзетулер енгізу керектігін ескертті. Жалпы, биыл ауданда бір жаңа мектеп және екі жапсарлас ғимараттың құрылысы жүргізіліп, 9 мектеп күрделі жөндеуден, 12 мектепте ағымдағы жөндеу жұмыстары атқарылмақ.

Өңір басшысы осы ауылдағы су тарту нысандары мен су құбырлары құрылысының барысымен де танысты. Бұл жұмыстарға 27 адам жұмылдырылған десек, оның 15-і жұмыспен қамту орталығы арқылы тартылған.

— Жобаны аяқтау келесі жылға жоспарланғанымен, сіздер нысанды мерзімінен бұрын пайдалануға беруге тырысуыңыз керек. Сондай-ақ ауыз судың сапасы мен қорына назар аударыңыздар, — деді Б.Сапарбаев мердігер өкілдеріне.

Ынтымақ ауылдық округінің Мәдімар ауылы Жамбыл облысының ең Үлгілі ауылы атағына үміткер. Ауыл тұрғындары ауыз су, электр энергиясы және газбен қамтылған. Мәдениет үйі мен пошта бөлімшесі бар, бүгінде спорт алаңы салынуда. Ағымдағы жыл басынан бері мұнда бірде-бір құқық бұзушылық тіркелмеген.

Сонымен қатар, ауыл тұрғындары қайырымдылықпен белсенді түрде айналысып келеді. Айталық, мұқтаж көп балалы отбасына әкімдік 15 сотық жер телімін және құрылыс материалдарын бөлсе, ал ауыл тұрғындары аталған отбасына өз үйін тұрғызуға асарлатып қол ұшын беруде.

Ауылдағы 1965 жылы салынған орта мектепте 300-ден астам бала білім алуда. Биыл оқу орнын күрделі жөндеу үшін «Жұмыспен қамтудың жол картасы» бағдарламасы аясында 280 миллион теңге бөлінген. Бердібек Сапарбаев мектеп аумағын абаттандыру қажеттілігін атап өтті.

Көктал ауылында аймақ басшысы сумен жабдықтау жүйесінің құрылысының барысын барлады. Биыл ауданда ауыз сумен қамту бағытындағы 10 жобаны іске асыруға 4,7 млрд. теңге қарастырылған. Су құбыры Талас, Сарыкемер, Байзақ, Көктал, Қостөбе, Сеңкібай, Жанатұрмыс және Бурыл ауылдарына тартылмақ. Мәдімар және Дихан ауылдарындағы желілер де жөндеуден өтетін болады.

Облыс әкімінің аудандағы жұмыс сапары 13 мыңға жуық тұрғыны бар Бурыл ауылында түйінделді.

Биылғы жылы мұнда дене шынықтыру-сауықтыру кешенінің, орта мектептің, 180 орындық мәдениет үйінің құрылысы басталып, су құбыры желісін қайта құру, бірқатар көшелерде жарықтандыру жүргізу жоспарлануда. Өңір басшысы нысанның құрылыс барысымен танысып, ақсақалдармен кездесті.

— Мемлекет ауыл тұрғындарының өмір сүру сапасын жақсарту үшін маңызды шаралар қабылдауда. Сіздердің ауылдарыңыз – тамаша үлгі. Тек осы жылдың өзінде әлеуметтік маңызы бар мәселелерді шешуге 2,6 миллиард теңге бөлінді. Өз кезегінде сіздер де ауылдағы тәртіпті қамтамасыз етуге, мәдени іс-шаралар ұйымдастыруға, жастар арасында татулық, түсіністік және ұлтаралық келісімге негізделген тәрбие жұмыстары күшейтуге назар аударуларыңыз керек. Жастардың күш-жігерін шығармашылық бағытқа бағыттау – аға буынның басты міндеті, — деді облыс әкімі ақсақалдармен әңгіме барысында.

ПІКІР