Ізгіліктің бастауы – қасиетті Рамазан

0 0

Бейбіт МЫРЗАГЕЛДИЕВ,

Қазақстан мұсылмандары діни басқармасының облыстағы өкіл имамы

Көгілдір күмбезді көк аспан әлемінде жаңа ай туып, жер бетіне шуағын шаша бастады. Бұл айдың тууын мүміндер аңсап, асыға күтуде еді. Дәл осы ай туғанда он төрт ғасыр бұрын Алла Елшісі адамдарды былайша сүйіншілеген: «Ей, адамдар, ұлы және қасиетті ай жақындады, төбелеріңе көлеңкесі түсті. Бұл айда мың айдан да қайырлы Қадір түні бар. Алла сол қасиетті айдың күндізінде оразаны парыз қылды, түндерінде нәпіл намазын заңды қылды. Бұл айда үлк енді-кішілі жақсылық жасаған адам басқа айларда бір парызды орындағандай сауап алады. Бұл айда бір парызды орындау – басқа айлардағы жетпіс парыз болып есептеледі. Бұл ай – Алла үшін аштық пен шөлдің, құлшылық пен тағаттың машақаттарына сабыр мен төзімділіктің айы. Сабырдың қайтарымы – жұмақ. Бұл ай – жәрдемдесу айы. Бұл ай – мүміндердің ризығын арттыратын ай. Бұл айда кім ораза тұтқан мүмінге аузын ашатын бір нәрсе беретін болса, жасаған бұл ісі күнәларының кешірілуіне және тозақтан құтылуына себеп болады. Ораза тұтқан адамның сауабы азаймастан соның алатындай сауабына ие болады». Иә, бұл – әрине, барша мұсылманды сағындырып жеткен қасиетті Рамазан айы!

Алғашқы мұсылмандар осынау мүбәрак аймен қимай қоштасып, ал келесі жылы құдды қырық жыл көрмеген қонағын күткендей құшақ жая қарсы алады екен. Өйткені бұл ай әрбір жанға иләһи мейірімнің бір сынығын сыйлайтын сауабы мол маусым.

Алланың Елшісі (с.ғ.с.) ұлық айды ерекше бағалап, үмбетіне үлгі қалдырған. Имам Ахмад жеткізген риуаятта Пайғамбар (с.ғ.с.) ражаб айы кірген уақытта: «Уа, Алла! Бізге Ражаб пен Шағбанның берекесін бер! Рамазанға аман-сау жеткізе көр!» (Ахмад хадистер жинағы), деп тілек тілеген екен. Алла Тағала былай дейді: «Уа, мүміндер! Өздеріңнен бұрынғыларға парыз етілгендей сендерге де ораза ұстау парыз етілді. Бәлкім сол арқылы күнә атаулыдан сақтанып, тақуалыққа жетерсіңдер» (Бақара сүресі, 183-аят).

Рамазан – он бір ай бойы кір шалып, тот басуға аз қалған рух пен жүректің қайта тазарып, кемелденуі үшін Құдай Тағаланың арнайы бекіткен киелі бағдарламасы. Рамазан – атойлаған нәпсіге тойтарыс беріп, оған қыл бұрау сала ауыздықтау айы. Рамазан – қара ниетті шайтанның ауыз бекіткен адам баласын азғыруда амалы құрып, кері шегінетін айбарлы айы. Мұхаммед пайғамбардың (с.а.у.): «Рамазан айы келгенде, жәннаттың есіктері айқара ашылып, тозақтың есіктері жабылады, шайтандар кісенделеді» деуі бұл айда шайтан атаулының көксегеніне жете алмай, дымы құритынын білдіреді. Рамазан – құлдың Хақ Тағалаға барынша жақындау үшін күллі қам-қарекетін салатын, бар жігер-қайратын төгетін ұлы ай. Рамазан – сексен үш жылдың сауабына тең келер қасиетті Қадір түні бар ең берекелі ай.

Биыл исі мұсылман жұртшылық асыға күткен қасиетті ай сәуірдің 24 жұлдызында басталады, ал 23 сәуірде тарауық намазы оқылады және ораза 30 күнге толмақ. Ұлық Ораза Айт мерекесі 24 мамырда аталып өтеді.

Күллі әлемді аузына қаратып, уайым мен сарсаңға салған індет коронавирус пандемиясы салдарынан көпшілік карантинде үйлерінде отыр. Ал мешіттерде жамағатпен намаз оқуға сол себепті де уақытша тыйым салынды. Осы орайда «Карантиндегі Рамазан айы қалай болмақ?» деген түрлі сауалдар туындап отыр. Соларға жауап беріп көрелік.

КАРАНТИНГЕ БАЙЛАНЫСТЫ ОРАЗАНЫ КЕЙІН ӨТЕУГЕ БОЛАДЫ МА?

Шариғат бойынша балиғатқа толған, ақыл-есі дұрыс әрбір мұсылманға Рамазан айында ораза ұстау – парыз. Алайда жолаушыларға, сырқаттанған немесе денсаулығы нашар адамдар ауруының асқынуынан қауіптенсе және сенімді дәрігер ұзақ уақыт бойы ашығудан денсаулығы күрт нашарлап кетуі мүмкін деген шешім қабылдаса, сондай-ақ жүкті немесе емізулі баласы бар әйелдерге ораза тұтуды кейінге қалдыруға, денсаулығы дұрысталған келесі жылдарда қарыз күндерін өтеуге шариғат рұқсат береді. Ал ораза – әрбір ақыл-есі дұрыс пендеге парыз болғандықтан дені сау адам әлемде карантин болып жатыр деп бекерге оразаны тәрк етуі дұрыс болмайды.

АУЫЗАШАР БЕРУ ТӘРТІБІ

Рамазан айында ауызашар берудің сауабын білмейтін адам кемде-кем шығар. Алайда бүгінгі оқиғаларға байланысты бұл сауапты амалды қалай жасауға болатынын Қазақстан мұсылмандары діни басқармасының төрағасы, Бас мүфти Наурызбай қажы Тағанұлы: «Жұқпалы індеттің таралуының алдын алу мақсатында мешіттерде, дәмханаларда, қоғамдық орындарда тағы басқа мекемелерде жиналып ауызашар беруді уақытша тоқтатуға шақырамыз» деп, карантин күндері әркім өз шаңырағында отбасы мүшелерімен ауызашар өткізуге, көпшілік орындарда (дәмхана, мейрамхана т.б.) жиналмауға үндеген. Мейрамханаларға тапсырыс беріп, ауызы берік адамдарға тамақ таратуға, әлеуметтік жағдайы төмен отбасыларға азық-түлік тарату арқылы ауыз аштыруға, ауызашарға жұмсалатын шығындарды ораза ұстаған адамдарға қаржылай беруге болатынын атап өткен болатын. Міне осы кеңестерге жүгініп, ауызашар сауабынан құр қалмайық деген кісілер үйде отырып, осылай игілік жасауына мүмкіндік бар. Үйде ораза ұстаушы адамның ауызашардағы ас-суын дайындап берудің өзі сауап екенін ұмытпаңыздар!

ПІТІР САДАҚАНЫ ҚАЛАЙ БЕРЕМІЗ?

Биыл пітір садақасы жан басына – 370 теңге болып бекітілді. Карантинге байланысты Қазақстан мұсылмандары діни басқармасы мобильді қосымша арқылы пітір беру жолдарын қарастырды. Kaspi bank пен діни басқарма бұл турасында келіссөз жүргізуде. Нәтижесінде кaspi.kz мобильді қосымшасына пітір-садақа бөлімі қосылып, ақша аударуға мүмкіндік туды.

Ал биылғы фидия мөлшері оразаның әр күні үшін 1700 теңге деп бекітілді. Құранда Алла Тағала «Бақара» сүресінің 184-аятында: «бір міскіннің тамағын берсін» деген. Яғни фидия дегеніміз – ораза ұстауға шамасы келмеген адамның бір кедейді отыз күн таңда және кешке тамақтандыру немесе алпыс кедейді бір күн таңертең, яки кешке тамақтандыру. Оны ақшалай да беруге болады. Оның мөлшерін әр елдің мүфтияты нарыққа байланысты белгілейді. Фидия беруге шамасы келмеген кісі Алладан кешірім тілейді.

ҚҰРАН ОҚЫҢЫЗ!

Рамазан – Құран айы. Қасиеті мен қадірі асқақ ұлық айда көбірек Құран оқып, хатым жасап, жаттап, қазақша мағынасына да мән беріңіз. Хадисте: «Кiм Алла Тағала кiтабының бiр әрпiн оқыса, оған одан бiр жақсылық бар әрi жақсылық он есе арта түседi. «Әлиф-ләм-мим»-дi бiр әрiп демеймін. Бәлкiм,«әлиф» бiр әрiп, «ләм» бiр әрiп, «мим» бiр әрiп», деген.

МІНЕЗ-ҚҰЛҚЫҢЫЗҒА КӨҢІЛ БӨЛІҢІЗ!

Отбасыңызға көңіл бөліп, балалардың діни тәрбиесін қадағалап, ағайын-туысқа хабарласып тұрыңыз. Ислам – иман, амал, ахлақтан тұрады. Бүгінгі күні ахлақ мәселесі мұсылмандар арасында ақсап тұрғаны жасырын емес. Діни кітаптар оқып, онлайн дәрістерге қатысып, өз мінезіңізді дұрыстауға көңіл бөліңіз!

НӘПІЛ НАМАЗЫН ҰМЫТПАҢЫЗ!

«Жұмыста жүрміз» деп намазға кей кісілерде уақыт табылмаған болса, енді карантиндесіз. Намаз бастаңыз, оқып жүрген болсаңыз нәпіл намаздарын қосып, Алла алдында ұзағырақ болыңыз! Бекітілмеген сүннетті қоса оқи жүріңіз. Хадисте: «Алла екінті намазының алдындағы төрт бас намаз оқыған адамды мейіріміне бөледі» делінген. Алла Тағала Рамазан айын бізге Өзі разы болатындай пайдалы өткізуді жазсын!

Leave A Reply

Your email address will not be published.