Жамбыл жаңалықтары

Сенім жүгі

Еліміздің және Елорданың дамуына үлес қосқан азаматтарға «Астана – 20 жыл» мерейтойлық медальдары табысталды

Кеше облыстық әкімдікте Астана қаласының 20 жылдығына орай салтанатты жиын өтті. Облыс әкімі Асқар Мырзахметовтің қатысуымен өткен шара барысында Қазақстан және Елорданың қалыптасуы мен дамуына қосқан елеулі үлесі үшін ҚР Президентінің Жарлығымен марапатталғандарға «Астана-20 жыл» мерейтойлық медальдары табысталды.

Мерейлі мерекеге орай ізгі тілегін жеткізген аймақ басшысы Асқар Исабекұлы Елбасы Жарлығымен марапатталып отырғандардың қай — қайсысы да құрметке лайық екенін атап өтті.

– Ел астанасының Алатаудың төрінен Сарыарқаның төсіне көшірілгені кеше сияқты еді… Енді міне, тәуелсіздігіміздің тірегі, Отанымыздың жүрегі – Астананың қазақтың кіндік қаласы болғанына да жиырма жылға жуықтапты. Биыл күллі Қазақстан Елорданың жиырма жылдығын бар сән-салтанатымен атап өтпекпіз. Астана – ұлтымыздың ұясы, ұлы мұраттарға ұмтылған еліміздің ерек символы. Астана – барша қазақстандықтың мақтанышы, жүрегінде аялап жүрер асылы. Астана күні – тек бір қаланың ғана мейрамы емес, бүкіл ел болып атап өтетін жалпыхалықтық мереке. Ендеше, баршаңызды аяулы Астанамыздың 20 жылдығымен шын жүректен құттықтаймын!, – деген облыс басшысы мерейтойлық медальдарды салтанатты түрде табыс етті.

Марапатталғандар қатарында облыс әкімінің бірінші орынбасары Бекболат Орынбеков, облыстық мәслихаттың хатшысы Бағлан Қарашолақов, облыс әкімі аппаратының басшысы Нұржан Календеров, облыстық қоғамдық кеңестің төрағасы Жандар Кәрібайұлы, облыстық ардагерлер кеңесінің төрағасы Еркінбек Солтыбаев, ҚР Парламенті Сенатының экс-депутаты Александр Савченко және өзге де бірқатар саланың өкілдері бар.

Марапаттау рәсімінен кейін сөз алған тағдыршешті кезеңде Қазақстан Парламенті Сенатының депутаты қызметін атқарған саясаттанушы, облыстық қоғамдық кеңестің төрағасы Жандар Кәрібаев ол күндерді зор тебіреніспен еске алып, ақжарма тілегін білдірді.

Мұнан кейін сөз алған басқа да құрмет биігінен көрінген азаматтар мерекелік тілектерін жаудырып, шат-шадыман көңіл- күйде тарқасты.

Талғат НҰРХАНОВ

ПІКІР