«Tulparcard»-қа неге «тұсау» салынды?

0 0

Тараз қаласындағы қоғамдық көліктерге төлем жасаудың электронды жүйесін іске қосу кейінге шегерілді. Жоспар бойынша бұл жүйе 1 тамыздан бастап жұмыс істеуі керек еді. Электрондық билет жүйесін енгізуге кедергі келтіріп отырған мәселелер облыс әкімі Бердібек Сапарбаевтың төрағалығымен өткен кеңесте талқыланды.

Тараз қаласының әкімі Айтқазы Қарабалаевтың айтуынша, карантинге байланысты техниканы жеткізуде қиындықтар туындаған. Шаһар басшысы қажетті жабдықтар тамыз айының басында Қытайдан жеткізілетіндігіне сендірді. Сондай-ақ электронды карталар жоспарланған мерзімнен сәл кешірек Ресейден жеткізіледі.
Аталмыш мәселелерді ескере отырып, Айтқазы Қарабалаев аймақ басшысынан электронды билеттер жүйесін енгізуді 15 тамызға ауыстыруды сұрады. Ол tulparcard.kz сайты мен мобильді қосымшасы жасалып жатқандығын да айтып өтті.
– Тараз қаласының әкімдігі де, облыс әкімдігінің жолаушылар көлігі және автомобиль жолдары басқармасы да қолма-қол ақшасыз төлем жүйесін енгізуге тиісті деңгейде көңіл бөлмеген. Әуел бастан басқа өңірлердің тәжірибесін зерделеп, барлық қателіктерді ескеру қажет еді. Бірақ, бұл туралы ешкім ойлағысы да келмейді, – деді облыс әкімі.
Өңір басшысы Тараз қаласы әкіміне тұрғындар арасында ақпараттандыру жұмыстарын жүргізіп, жүйенің қалай жұмыс істейтінін түсіндіруді тапсырды.
– «Tulparcard» электронды картасы балаларымызды қорғауға тамаша мүмкіндік береді. Қосымша функцияларды қосу керек. Сіз бұл карталарды мектепке кіру үшін пайдаланып, асханада түскі ас үшін төлем жасай аласыз. Ал мобильді қосымша ата-аналарға балаларын бақылауға мүмкіндік беруі керек. Осы функциялардың бәрі жүйе іске қосылғанға дейін электрондық картаға және мобильді қосымшаға енуі тиіс, – деп тапсырды облыс әкімі.
Басқосу барысында өңірдегі цифрлық технологияларды дамыту мәселелері де талқыланды.
Облыстық инвесторларға қызмет көрсету, жобалық басқару және цифрландыру орталығының басшысы Дамир Егізбаев «Цифрлық Қазақстан» мемлекеттік бағдарламасына сәйкес «Ақылды қала» тұжырымдамасының жүзеге асу барысы туралы баяндады.
Цифрлық технологияларды дамытуда да шешімін күткен көптеген мәселелердің бар екені белгілі болды. Бұл орайда құрылыс, әлеуметтік сала, экология, қауіпсіздік, көлік, тұрғын үй коммуналдық шаруашылық, бизнес және туризм салаларында төмен көрсеткіштер байқалады.
Орталық басшысы аудандарда бейнебақылау камераларының санын көбейтуді, «112» бірыңғай кезекшілік-диспетчерлік қызметін енгізуді, салынып жатқан және пайдалануға берілген нысандарды бақылайтын интернет-ресурс құруды, электрондық денсаулық паспорттарын енгізу бойынша жұмыстарды күшейтуді, телемедицина мүмкіндіктерін барынша пайдалану жобаларын ұсынды.
Облыс әкімі «Ақылды қала» тұжырымдамасын жүзеге асыру жұмыстарын жүйелеуді тапсырды.
– Цифрландыру жұмыстары әлсіз және жүйесіз жүргізіліп жатыр. Инвесторларға қызмет көрсету, жобалық басқару және цифрландыру орталығы мен басқармалардың өзара келісім мен үйлесімді жұмысы көрінбейді. Біз өмірімізді жақсартудың көптеген мүмкіндіктерін жіберіп аламыз. Президент Қасым-Жомарт Тоқаев цифрландыру тек бір саланы жетілдіруге ғана емес, экономика мен қоғамдық өмірдегі елеулі өзгерістерге де бағытталғанын әрдайым айтып келеді. Тіршіліктің барлық салаларына озық және заманауи технологияларды енгізу басым міндет болып қалуы тиіс, – деп түйіндеді Бердібек Сапарбаев.

Облыс әкімінің баспасөз қызметі

Leave A Reply

Your email address will not be published.