Жайбасарлық жетістікке жеткізбейді

0 0

Облыс әкімі Бердібек Сапарбаевтың төрағалығымен өткен аппараттық кеңесте ауыл тұрғындарының тұрмыстық табысын жақсарту бойынша пилоттық жобаны жүзеге асыруға, сондай-ақ өңірде цифрлық технологияларды дамытуға қатысты мәселелер сараланды.

Облыс әкімдігі ауыл шаруашылығы басқармасының басшысы Берік Нығмашевтің айтуынша пилоттық жоба облыстың он ауданындағы 11 ауылдық округті қамтуда. Жобаға қатысуға 2459 тұрғын ниет білдірген. Бүгінгі күнге барлығы 2933 өтінім түссе, жалпы сомасы 8 миллиард 299 миллион теңгені құрайтын 2437 өтінім мақұлданып, қаржыландырылған.
Жоба аясында бюджеттен бөлінген қаржы ауыл маңындағы және үй іргесіндегі жер учаскелерін тиімді пайдалануға, мал шаруашылығын дамытуға, құрылған ауыл шаруашылығы кооперативтері үшін техника мен жабдықтар сатып алуға бағытталған. Бұл орайда ақша шаруаларға бөлініп берілді. Алайда, барлық ауданда жұмыс белсенді жүргізілуде дей алмаймыз. Ал, Қордай мен Мойынқұм аудандарында ауыл шаруашылығы алқаптарын пайдалану жұмыстары нақты іс жүзінде әлі басталмаған. Келісімшарт талаптары бойынша есепшотқа ақша түскеннен кейін 10-15 күн ішінде қатысушылар мал сатып алуға тиісті болғанымен, Байзақ, Сарысу, Қордай және Шу аудандарында ол жұмыстар өз мерзімінде орындалмай отыр.
Тұрғындар табыстарын арттыруға, ол үшін аянбай жұмыс жасауға ниет білдірді. Мемлекет оларға қолдау көрсетіп, қаржы бөлді. Ал, енді не кедергі болып отыр? Жобаның бастапқы кезеңінде неге мұндай келеңсіздіктер орын алуда?
Өңір басшысының сауалдарына Байзақ, Сарысу, Қордай және Мойынқұм аудандарының әкімдері жауап берді. Олар ұйымдастыруды күшейтіп, жұмыс жасайтындықтарын айтып сендірді. Дегенмен, рұқсат етілген мерзімдер аяқталған.
– Бұл жобаға республика деңгейінде айрықша назар аударылып отырғанын білесіздер. Бізге көрсетілген қолдау мен сенімді ақтау қажет. Барлық бес бағыт бойынша жұмысты жандандыру керек.
Әсіресе, егін шаруашылығына ден қойып, егін егу үшін қолайлы мерзімді өткізіп алмау керек. Мал басын көбейту, оның өнімділігін арттыру да маңызды міндет болып табылады, – деді Б. Сапарбаев.
Басқосу барысында күн тәртібіндегі екінші мәселе бойынша инвесторларға қызмет көрсету, жобалық басқару және цифрландыру орталығының басшысы Дамир Егізбаев сөз алып, облыс бойынша «Цифрлық Қазақстан» мемлекеттік бағдарламасының орындалу барысы туралы баяндады.
Оның айтуынша, өңірімізде аталған бағдарламаны жүзеге асыру 11 бағыт бойынша жүргізілуде. Өткен жылы 2,8 миллиард теңгеге 52 жоба іске асырылған. Оларды іске асырудың экономикалық тиімділігі 1,2 миллиард теңгені құраған.
Облыста республика бойынша алғаш рет жол полициясы автокөліктеріне «АРКАН» мобильді кешені енгізілді. Нәтижесінде жол-көлік оқиғаларының көрсеткіші орта есеппен 5-7 пайызға төмендеуі болжанып отыр. Цифрландыру бойынша білім беру, денсаулық сақтау, тұрғын үй-коммуналдық шаруашылық, көлік салаларын қамтитын бірқатар жобалар енгізілді. Ағымдағы жылы облыста цифрландыруды одан әрі дамыту аясында 52 жобаны іске асыру жоспарлануда.
Айта кету керек өңірде цифрлық технологияларды дамыту ісінде шешілмеген мәселелер де жоқ емес. Облыс әкімі олардың қатарындағы ең өзектілерін тілге тиек етті. Бердібек Сапарбаев әлі де интернетпен қамтылмаған елді мекендер бар екендігін айтты. Интернетпен қамтылғанның өзінде оның жұмыс істеу жылдамдығы ойдағыдай емес. Бұл мәселе оқушыларды қашықтан оқыту барысында айқын көрініс табуда.
Өңір басшысы қалалар мен ауылдық елді мекендерде бейнекамераларды, соның ішінде «Сергек» сияқты модельдерді орнату бойынша жұмыстарды жалғастырудың маңыздылығын жеткізді. Ол көшелердегі тәртіп пен қозғалысты реттеуді қамтамасыз етеді. Облыстық мемлекеттік органдар көрсететін электрондық қызметтердің деңгейін арттыру қажет. Өңірде ақпараттық қауіпсіздікті қамтамасыз ету, қоғамдық көліктерде электрондық билеттендіруді енгізу, бірыңғай кезекші-диспетчерлік қызметті құру маңызды міндет болып табылады. Жобалардың бір бөлігін мемлекеттік-жекеменшік әріптестік шеңберінде іске асыру керектігі айтылды.

Облыс әкімінің баспасөз қызметі

Leave A Reply

Your email address will not be published.